Iltasatu

Pitäs tilata uuen verokortin. On pitäny tilata se jo kuukauen. Miten se tuntuuki niin mahottoman hankalalta? Laskuja pitäs kans maksaa, ja tehhä muutaki virallista. Emmie halva, mie en ole mikhän viralinen ihminen. Haloo, olisko täälä kethän kirjanpitäjää, joka vois auttaa? Ilmaseksi. Haloo?

Ei kethän, kaikukhan vastaa.

Pitäs alkaa kuntoilemhan. Ostaa sukset ja kengät, ja ajjaa latu. On pitäny alkaa jo viimiset viis vuotta. Miten se tuntuuki niin mahottoman vaikealta? Emmie halva, mie en ole mikhän atleetti. Haloo, olisko täälä kethän personal traineria, joka vois auttaa? Ilmaseksi. Haloo?

Ei kethän, aivan hiljasta.

Pitäs alkaa kirjottamhan jotaki järkevää. Koota pöytälaatikosta kaikki vanhat liput ja laput aikakauelta ennen tietokonetta, siirtää tietokonhen miljoonista kansioista kaikki yhthen. On pitäny tehhä arkistointi jo aikoja sitte, mutta miten se tuntuuki niin työlhältä? Emmie jaksa, mie en ole mikhän järjestyksen ihminen. Haloo, olisko täälä kethän sihteerikoulun käynyttä, joka vois auttaa? Ilmaseksi. Haloo?

Ei kethän.

Jos minula olis varraa, niin minula ei olis yhthän haavetta. Onneksi mie en ole mikhän miljonääri. Paitsi unelmien suhthen. Niissä mie olen rikhampi ko Roope Ankka.

Seki vain on satua.