Likaset silmälasit

Minula on likaset silmälasit.

Se johtuu siitä, että minula on nykysin niin monet lasit, että mie vain lyön uuet päähän ko emmeinaa ennää läpi nähhä. Emmie lotossa ole voittanu, netistä tilasin. 39 euroa kipale.

Mie nimittäin ostin parila saalla lasit jostaki merkkiliikhestä enkä sitte saattanu pittää niitä ko painoit nokkaa ja korvitten päältä ja vinossaki olit. Tuntu mahottoman hankalalta lähteä niitten kans uuesti liikheshen, ja niin mie tilasin netistä useaman parin ja yhet arskat (niissä on semmosia timanttia).

Oikeasthan minula oli kaks syytä, miksi käyttäyvyin tuolla laila ouvosti. Tai siis kolme. Ensimäinen oli tietenki se, että mie olen outo. Mutta toinen oli se, etten kehannu mennä ko jos siinä oliski käyny niin, että minun nokka vain olis kasunu ja korvat vaihtanhet paikkaa, niin olishan se noloa. Nyt vain en saa sitä tietää koskhan ko Pitkäaikanen tietenki kohteliihasti väittää, että nokka on justhinsa yhtä iso ko ennenki. Kolmas syy oli se, että mie yhtäkkiä hoksasin, että lasiahan on kauhean soma soppailla. Jouluksi taijan tilata joululasit. Pikku kulkusilla, että tiiän, missä olen, jos net kovin pahasti likastuvat.

Minula on likaset silmälasit.

Non niin likaset, että en ole tääläkhän nähny käyä monhen aikhan. Jos mie oikhein tarkoin tihrustan, näyttää siltä, että puoli vuotta on mennä holahtannu tuosta vain. Käsikopelolla onnistuu kyllä melkhein kaikki muu, niin ruan laittaminen ko siivoaminenki. Joo, naurakaa vain. Pari kertaa olen kokkeillu. Mutta oman plokin päivittäminen on mahoton tehtävä. Tänne pittää kerta kirjottaa kieli keskelä suuta.

Minula on likaset silmälasit.

Son hyvä. Minun lapsi lähtee huomena mailmale yksin ensimäistä kertaa. No, mammu tietenki on matkassa, mutta ilman minua. Moneksi yöksi. Linja-autola. Oma reppu matkassa. Evhät repussa. Tonnikallaa ja suklaamössöä.

Mie en kestäis sitä, jos mie näkisin, ettei se ole kotona. Nyt mie voin kuvitella, että se vain kiltisti istuu pöyvän päässä ja piirtää äitile syvämiä ja jou-jou-poikia.

Mie kaivan huomena esile kaikista paskasimmat lasit.